అమరావతి: ట్విటర్ తీరుపై ఆగ్రహంతో ఉన్న కాంగ్రెస్ కార్యకర్తలు ఒక పక్షి ని ఫ్రై చేసి దాన్ని ఆ సంస్థ కార్యాలయానికి పార్సిల్ చేసి పంపించి తమ కసి తీర్చుకున్నారు. కాంగ్రెస్ నాయకుడు రాహుల్ గాంధీ అక్కౌంట్ ట్విటర్ సంస్థ నిలిపివేయడాన్ని నిరసిస్తూ ఈ కార్యక్రమం చేపట్టారు.
ఢిల్లీలో బాలిక రేప్ ఘటనపై రాహుల్ గాంధీ ట్వీట్ చేయగా, దానిపై బిజెపి ఫిర్యాదు చేయడం, జాతీయ బాలల హక్కుల కమిషన్ నోటీసులు జారీ చేయడంతో ట్విటర్ రంగంలోకి దిగింది. నిబంధనలకు వ్యతిరేకం అంటూ రాహుల్ అక్కౌంట్ ను వారం పాటు ఆపేశారు. దీనిపై రాహుల్ తో పాటు కాంగ్రెస్ నాయకులు మండిపడ్డారు. మాజీ ఎంపి జివి.హర్షకుమార్ కుమారుడు శ్రీరాజ్ బర్డ్ ను ఫ్రై చేసి దాన్ని గురుగ్రామ్ లోని ట్విటర్ కార్యాలయానికి పంపించారు. రాహుల్ అక్కౌంట్ నిలిపేసి తప్పు చేశారని, బిజెపి కుట్రతోనే ట్విటర్ ఈ చర్యకు దిగిందని ఆయన ఆరోపించారు. ట్విటర్ తన తీరును మార్చుకోవాలని డిమాండ్ చేశారు.
